1ܘܗܵܘܸܬ ܡܲܕܟܼܘܼܪܵܝ ܕܠܪܹ̈ܫܵܢܹܐ ܘܠܗܵܟܝܼܡܹ̈ܐ ܡܲܨܝܸܬܝܼ ܘܦܵܝܫܝ ܙܲܒܛ؛ ܘܕܗܵܘܝܼ ܗܵܙܸܪ ܠܟܠ ܦܘܼܠܚܵܢܵܐ ܛܵܒܼܵܐ؛ 2ܘܥܲܠ ܐ݇ܢܵܫܵܐ ܠܵܐ ܓܵܕܦܝܼ؛ ܘܠܵܐ ܗܵܘܝܼ ܡܲܩܪܸ̈ܨܵܢܹܐ؛ ܐܸܠܵܐ ܗܵܘܝܼ ܡܵܟܝܼܟܹ̈ܐ ܘܒܟܠ ܡܸܢܕܝܼ ܡܲܚܙܝܼ ܒܵܣܝܼܡܘܼܬܵܝ ܠܟܸܣ ܟܠܵܝܗܝ ܒܢܲܝ̈ܢܵܫܵܐ. 3ܣܵܒܵܒ ܐܘܼܦ ܐܲܚܢܲܢ ܩܵܕ݇ܡܵܝܬܵܐ ܟܝܼܡ ܚܝܼܵܠ ܝܼܘܵܚ ܗ݇ܘܵܘ؛ ܘܕܠܵܐ ܡܲܨܝܲܬܬܵܐ؛ ܘܡܘܼܚܠܸܛܹܐ؛ ܘܙܘܼܒܛܸܢܹܐ ܠܫܲܗ݇ܘܲܬܝܵܬܹ̈ܐ ܘܚܘܿܫ̈ܝܼܹܐ ܬܵܗܵܪܹ̈ܐ ܬܵܗܵܪܹ̈ܐ؛ ܘܒܒܝܼܫܘܼܬܵܐ ܘܒܒܲܚܸܠܵܢܘܼܬܵܐ ܟܹܐ ܚܵܕܪܵܚ ܗ݇ܘܵܘ؛ ܘܣܸܢܝܹ̈ܐ ܝܼܘܵܚ ܗ݇ܘܵܘ؛ ܐܘܼܦ ܒܸܣܢܵܝܵܐ ܚܲܕَ ܠܗ̇ܘ ܐ݇ܚܹܪ݇ܢܵܐ. 4ܐܝܼܢܵܐ ܟܲܕ ܦܸܫܠܵܗ̇ ܓܠܝܼܬܵܐ ܒܵܣܝܼܡܘܼܬܹܗ ܘܡܪܲܚܡܵܢܘܼܬܹܗ ܕܐܲܠܵܗܵܐ ܦܵܪܘܿܩܲܢ؛ 5ܠܵܐ ܡ̣ܢ ܦܘܼܠܚܵܢܹ̈ܐ ܕܙܲܕܝܼܩܘܼܬܵܐ ܕܥܒܸܕܠܲܢ؛ ܐܸܠܵܐ ܒܪ̈ܲܚܡܹܐ ܕܝܼܹܗ ܩܲܡ ܦܵܪܸܩ ܠܲܢ؛ ܒܣܚܵܝܬܵܐ ܕܗ݇ܘܵܝܬܵܐ ܡܸܢ݇ܕܪܸܫَ؛ ܘܒܚܲܕܲܬܬܵܐ ܕܪܘܼܚܵܐ ܕܩܘܼܕܫܵܐ؛ 6ܗ̇ܝ ܕܡܘܼܫܦܸܟܼܠܹܐ ܥܲܠܲܢ ܒܕܵܘܠܲܬܡܲܢܕܘܼܬܵܐ ܒܝܼܸܕ ܝܼܫܘܿܥ ܡܫܝܼܚܵܐ ܦܵܪܘܿܩܲܢ؛ 7ܕܒܫܵܦܵܩܲܬܹܗ ܦܵܝܫܵܚ ܡܘܼܟܫܸܛܹܐ ܘܗܵܘܵܚ ܝܵܪ̈ܘܿܬܹܗ ܒܗܹܒܼܝܼ ܕܚܲܝܹ̈ܐ ܕܠܐܵܒܲܕ. 8ܡܗܘܼܡܸܢܬܵܐ ܝَܠܵܗ̇ ܗܹܡܸܙܡܵܢ؛ ܘܒܐܲܢܹܐ ܟܹܐ ܒܵܣܡܵܐ ܠܝܼ ܕܐܘܼܦ ܐܲܢ݇ܬ ܗܵܘܸܬ ܡܲܩܘܘܼܝܵܝ؛ ܕܐܵܟܼܠܝܼ ܚܲܡ ܠܸܦܠܵܚܵܐ ܦܘܼܠܚܵܢܹ̈ܐ ܛܵܒܼܹ̈ܐ ܐܵܢܝܼ ܕܗܘܼܡܸܢܘܿܢ ܒܐܲܠܵܗܵܐ. ܐܲܢܹܐ ܨܦܵܝܝܼ ܝܢܵܐ ܘܡܵܪܹ̈ܐ ܦܲܝܕܵܐ ܠܒܢܲܝ̈ܢܵܫܵܐ. 9ܐܝܼܢܵܐ ܡ̣ܢ ܒܵܩܲܪ̈ܝܵܬܹܐ ܐܲܗܡܲܩܹ̈ܐ؛ ܘܡ̣ܢ ܗܲܩܝܲܬܹ̈ܐ ܕܐܘܼ̈ܓ̰ܵܓܼܹܐ؛ ܘܡ̣ܢ ܕܪ̈ܵܫܝܵܬܹܐ؛ ܘܡ̣ܢ ܦܠܵܫܹ̈ܐ ܕܢܵܡܘܿܣܵܐ ܦܨܝܼ؛ ܣܵܒܵܒ ܕܦܲܝܕܵܐ ܠܲܝܬ ܒܝܼܵܝܗܝ؛ ܘܒܵܛܝܼܠܹ̈ܐ ܝܢܵܐ. 10ܡ̣ܢ ܐ݇ܢܵܫܵܐ ܗܲܪܵܛܝܼܩܵܐ ܒܵܬ݇ܪ ܡܲܢܟܲܣܬܵܐ ܚܕܵܐ ܘܬܲܪ̈ܬܹܝ؛ ܦܨܝܼ. 11ܘܗܵܘܸܬ ܒܝܼܕܲܥܝܵܐ ܕܗ̇ܘ ܕܗܲܕܟܼܵܐ ܝܠܹܗ؛ ܩܠܝܼܒܵܐ ܝܠܹܗ؛ ܘܒܸܚܛܵܝܵܐ ܝܠܹܗ؛ ܘܥܒܼܝܼܕܵܠܹܐ ܓܘܼܢܵܗܟܵܪ ܓܵܢܹܗ. 12ܐܝܼܡܲܢ ܕܫܵܕܪܸܢ ܠܟܸܣܠܘܼܟܼ ܠܐܵܪܛܹܡܵܐ ܝܲܢ ܠܛܘܼܟܼܝܼܩܘܿܣ؛ ܚܵܒܸܛ ܕܐܵܬܸܬ ܒܟܸܣܠܝܼ ܠܢܝܼܩܵܦܘܿܠܝܼܣ؛ ܣܵܒܵܒ ܕܬܵܡܵܐ ܡܘܼܬܒܼܵܐ ܝܘܸܢ ܒܚܝܼܵܠܝܼ ܕܦܵܝܫܸܢ ܒܣܸܬܘܵܐ. 13ܠܙܹܐܢܵܐ ܣܵܦܪܵܐ ܘܠܐܵܦܲܠܘܿ ܡܲܦܫܸܛ ܒܚܵܒܵܛܘܼܬܵܐ؛ ܡܸܢܕܝܼ ܠܵܐ ܚܵܣܸܪ ܐܸܠܵܝܗܝ. 14ܘܝܵܠܦܝܼ ܐܘܼܦ ܐܵܢܝܼ ܕܝܼܢܵܐ ܕܝܼܲܢ ܕܗܵܘܝܼ ܒܸܦܠܵܚܵܐ ܦܘܼܠܚܵܢܹ̈ܐ ܛܵܒܼܹ̈ܐ ܒܫܘܼܠܹ̈ܐ ܠܵܙܸܡ؛ ܕܠܵܐ ܗܵܘܝܼ ܕܠܵܐ ܛܥܘܼܢܵܝܬܹ̈ܐ. 15ܒܝܼܵܗ݇ܒܼܵܐ ܝܢܵܐ ܫܠܵܡܵܐ ܐܸܠܘܼܟܼ ܟܠܵܝܗܝ ܐܵܢܝܼ ܕܝܼܢܵܐ ܥܲܡܝܼ ܗܲܒ݇ܠ ܫܠܵܡܵܐ ܠܟܠܵܝܗܝ ܐܵܢܝܼ ܕܡܲܚܸܒܝܼ ܠܲܢ ܒܗܲܝܡܵܢܘܼܬܵܐ. ܫܵܦܵܩܲܬ ܥܲܡ ܟܠܵܘܟܼܘܿܢ؛ ܐܵܡܹܝܢ.